Dje janë përcjellë për në banesën e fundit anëtarët e familjes Bllaca, babai, nëna, dy djemtë dhe vajza, që rezulton të jetë edhe autorja e krimit të pesëfishtë.
Por janë detajet që vijnë nga Gjilani që tregojnë se bëhet fjalë për një vrasje të mirëmenduar nga ana e punonjëses së policisë e cila jo vetëm që ka marrë pistoletën në rajonin e policisë po madje ka marrë edhe dy karikator me fishekë pasi ka dashur të sigurohet se do të mund ta realizonte veprën e saj të çmendur.
Referuar burimeve policore nga Kosova saktësohet se në vendin e ngjarjes janë sekuestruar plot 17 gëzhoja, nga të cilat saktësohet se secili nga pjesëtarët është qëlluar nga katër herë, ndërsa për veten i ka mjaftuar vetëm një plumb në kokë.
Sipas të dhënave saktësohet se Fisniku, vëllai i vogël është gjetur i vdekur në krevat, çka do të thotë se ka qenë ende i pa zgjuar nga gjumi, ndërsa pjesa tjetër janë vrarë në kuzhinë. Policia saktëson se të katër viktimat e punonjëses së policisë kanë patur plagë në pjesën e kokës, çka do të thotë se vrasjet të gjitha i ka bërë me plumb në kokë.
Megjithatë ende nuk kanë përfunduar ekspertizat në vendin e ngjarjes dhe ende nuk janë siguruar të gjitha dëshmitë që lidhen me ecurinë e shëndetit mendor të autores së krimit. n.k/Fjala.al/
