Vrasja e ndodhur dy ditë më parë në Durrës, ku një grua u godit për vdekje me mjete të forta nga bashkëshorti i saj, ka tronditur opinionin publik dhe ka rikthyer debatin mbi dhunën në shoqërinë shqiptare. Dije Tasuni u vra nga bashkëshorti i saj, Rruzhdi Tasuni, brenda dyqanit që kishin në administrim në qytetin bregdetar.
Por një nga momentet më trishtuese ishte vajtimi i Santiljana Tasunit, vajzës së viktimës, kur mësoi për ngjarjen. Video u shpërnda në mediat online dhe rrjetet sociale, ndërkohë që Santiljana ka publikuar një mesazh që duhet lexuar.
Mesazhi
Unë jam vajza e videos së famshme. Unë jam Ana. Vajza e vogël e Dijes. Unë jam ajo që ulërija e vajtoja shpirtin e shpirtit tim, nënës time fatkeqe, nënës time të mjerë. Nënës që kaloi gjithë jetën në vuajtje për të na rritur ne. Po e bëj këtë postim për ju portale të famshme dhe për ju njerëz që villni vrer e përfitoni në hallin që më ka zënë mua sonte. Në atë hall që unë do mbaj gjithë jetën mbi supe. Ju sigurisht e pas dy tre ditësh nuk do e kujtoni më emrin tim apo të nënës time.
Me shumë mundësi pas një muaj do keni harruar dhe ngjarjen.
Po ju shkruaj që t’ju bëj një thirrje të gjithëve. Fshini videon time, mos u merrni më me mua. Mjaft e keqpërdorët për disa like të fëlliqura apo komente.
Unë jam ajo që trokiti dyer të afërmish që bënin sikur s’ma dinin hallin, dyer doktorësh që më përcollën duke më thënë që s’kam pse shqetësohem, dyer policash që se gjykuan si shumë të rëndësishëm rastin e mamasë time. Po mami im, Dija ime, ishte një grua e zakonshme me një fuqi të jashtëzakonshme, që duroi 30 vjet në një martesë, punoi me ndershmëri për të rritur e shkolluar tre vajza.
Dija mund të ishte motra jote, mami jot, vajza jote. Dija mund të jetë të gjitha këto e ti se di akoma. Ti mund ta kesh Dijen në shtëpinë ngjitur dhe bën sikur se dëgjon se nuk është puna jote. Dhe sot ti poston për Dijen, komenton për Dijen, flet për Dijen. Epo sot ajo s’të dëgjon dot më.
Mjaft o njerëz të fëlliqur, mjaft u morët me ne tani që s’ua kemi më nevojën. Unë jam Ana dhe sot (dje) varrosa Dijen. Uroj që ti mos të bëhesh kurrë Ana.
Lidhja jashtëmartesore e burrit dyshohet se u bë shkak për masakrën e Durrësit!
