Në faqen zyrtare të Britanisë së Madhe, në seksionin për udhëtarët britanikë është përditësuar informacioni që jepet për Shqipërinë. Britanikëve që planfikojnë të vizitojnë Tiranën këtë periudhë u është kërkuar që të tregohen të vëmendshëm dhe të shmangin protestën e 2 marsit.
Protesta është thirrur nga presidenti Ilir Meta kundër atij që e quan “grusht shteti” për kapjen e Gjykatës Kushtetuese nga mazhoranca e drejtuar nga kryeministri Edi Rama.
Edhe pse nuk përmenden informacione për dhunë të mundshme gjatë protestës, qytetarëve britanikë u kërkohet që të qëndrojnë larg saj.
“Është mundësia e protestës politike që do zhvillohet në qendër të Tiranës, të hënën, 2 mars. Ju duhet të kontrolloni median lokale për informacionet e fundit, të mbeteni vigjilentë dhe të shmangni çdo demonstrim. Ndiqni këshillat e autoriteteve lokale”, shkruhet në faqen e Qeverisë Britanike.
Edhe Ambasada e SHBA-së në Tiranë kërkoi dy ditë më parë nga qytetarët e saj në Shqipëri që të shmangin manifestimin e 2 marsit, pasi mund të regjistrohen edhe akte dhune.
Gjithsesi, nga Presidencia e Shqipërisë u është kërkuar qytetarëve që të protestojnë paqësisht dhe pa akte dhune.
