-Panik në Durrës, vrasja e dyfishtë ishte ekzekutim mafioz. FNSH në aksion
Dy persona kanë mbetur të vdekur mbrëmjen e sotme në Durrës. Ngjarja ka ndodhur në zonën e Shkozetit, në lagjen 14, ku dy persona janë qëlluar me armë. Nga spitali i Durrësit konfirmohet se dy viktimat janë të seksit mashkull.
Një nga viktimat është identifikuar si shtetasi A. Avdia, ndërsa viktima tjetër është shtetasi me iniciale D.Sh., 35 vjeç.
Një tjetër person ka mbetur i plagosur.
Mësohet se viktimat kanë qenë duke lëvizur në këmbë kur janë qëlluar me armë kallashnikov.
Policia dhe ambulanca ndodhet në vendin e ngjarjes.
Njoftimi i policisë
Më datë 02.03.2020, rreth orës 18:55, në lagjen nr. 14, Nishtulla, Durrës, në rrugën afër tregut të perimeve, në rrethana akoma të paqarta kanë humbur jetën shtetasit D. Sh, 35 vjeç dhe A. A, dyshohet me armë zjarri.
Menjëherë në vendngjarje kanë mbrritur forca të shumta policie, si dhe grupi hetimor.
Janë ngritur pika kontrolli dhe është rrethuar zona në një perimetër të gjerë.
Pika kontrolli janë ngritur edhe nga DVP Tiranë e Fier në aksin rrugor Durrës-Tiranë e Durrës-Lushnjë.
Në mbështetje të Policisë vendore janë nisur dhe grupe të FNSH-së së Tiranës, për krehjen e zonës.
Paraprakisht dyshohet se është qëlluar nga një automjet në lëvizje. Shërbimet e Policisë kanë mundur të identifikojnë targat dhe janë vënë në ndjekje të autorëve.
Për zbardhjen e ngjarjes, në ndihmë të grupit hetimor po shkojnë specialistët e Krimeve të Rënda në Departamentin e Policisë Kriminale.
Grupi hetimor, nën drejtimin e Prokurorisë, po vijon veprimet në vendngjarje, duke grumbulluar dhe fiksuar çdo provë sado të vlefshme që do t’i shërbejë zbardhjes së ngjarjes.
