Skuadra e Kukësit ka zyrtarizuar Orges Shehin në postin e trajnerit të ri të skuadrës, pas shkarkimit nga detyra të Shpëtim Duros ditën e shtunë.
Shehi ka firmosur një kontratë me verilindorët deri në verën e vitit 2021, teksa u prezantua nga drejtori sportive Nderim Nexhipi dhe administratori i klubit Lavdrim Gjici.
Gjatë konferencës për shtyp Shehi pranoi se Kukësi për të është një vitrinë e rëndësishme, një skuadër e madhe:
“Suksesi është i rëndësishëm për një trajner. E zgjodha Kukësin sepse është një skuadër e madhe. Është arritje personale. Me shtyu cilësia e klubit dhe lojtarit. Është e rëndësishme të kesh grupin. Kam qenë pa skuadër këto kohë, isha si analist në një studio dhe e kam ndjekur Kukësin”-u shpreh ai.
Sipas Shehit verilindorët i kanë të gjitha mundësitë për të fituar titullin kampion të këtij viti.
“Normal ku ka pritshmëri, ka presion. Duhet të jetë pozitiv presioni. Unë jam i bindur që mund të dalë kampion. Ka diference kur i shikon gjërat nga jashtë. Nuk ka probleme të mëdha, por vetëm një ngërç psikologjik prej mënyrës se si i kanë lënë pikët në ndeshjet e fundit. Pasnesër kemi ndeshje, nuk ndryshoj dot shumë gjëra. Do punoj në aspektin psikologjik. Duhet të kuptojnë lojtarët që janë më të mirët dhe këtë do ua them shpesh.
Titulli është i arritshëm, duke parë grupin e lojtarëve. Nuk do i shohim kundërshtarët. Nëse në i fitojmë krejt ndeshjet dhe ata nuk ndalen, u japim dorën. Duhet të shohim përpara, Tirana është në vend të parë. Gjithsesi ne do të shohim vetëm ndeshjen e radhës. Që sot kam në dorë listën dhe çfarë kam parë të gjithë kanë luajtur. I meshoj asaj që kemi ngërç psikologjik dhe të heqin mendimin se ndëshkohen në fund”.-vijoi më tej ai.
Ndërkohë rikujtojmë se Duro u shkarkua nga detyra e trajnerit të Kukësit pas barazimit 2 me 2 me Teutën në Durrës si dhe dy ndeshjeve të tjera ku u mund me rezultatin 2-1 nga Tirana dhe mori sërish barazim me Bylisin./Fjala.al/
