Veriu i Italisë do të mbyllet. Giuseppe Conte, kryeministër i Italisë, ka firmosur një dekret ekstrem ku ndalon lëvizjen e qytetarëve në rajonin e Lombardisë dhe në 14 provinca të tjera. Masa është marrë për të parandaluar shpërndarjen e koronavirusit, nga i cili numri i të infektuarve ka arritur në 5883.
Në Lombardi dhe në provincat e Modena, Parma, Piacenza,Reggio Emilia, Rimini, Pesaro e Urbino, Alessandria, Asti, Novara, Verbano Cusio Ossola, Vercelli,Padova, Treviso dhe Venezia, do të ndalohet hyrja dhe dalja e banorëve. Lëvizja do të kryhet vetëm në rastet e emergjencave.
Por kufizimet nuk do të jenë vetëm për hyrje-daljet, por edhe brenda këtyre zonave do të kufizohet lëvizja e njerëzve.
Dekreti parashikon që autoritetet lokale të thërrasin për ndihmë edhe policinë e ushtrinë, nëse është e nevojshme, për të bërë të mundur zbatimin e masave.
Pub-et dhe disco-t do të qëndrojnë të mbyllura, ndërsa baret dhe restorantet do të vijojnë të hapura vetëm nëse stafi arrin të ruajë distancën prej të paktën 1 metër midis klientëve. Edhe për supermarketet funksionon i njëjti rregull, ku menaxherët duhet të shmangin krijimin e radhëve të njerëzve.
Shumë shkolla dhe universitete janë urdhëruar të qëndrojnë të mbyllura.
Këto masa ekstreme do të jenë në zbatim deri më 3 prill.
Vetëm rajoni i Lombardisë ka të paktën 10 milionë banorë dhe të cilët do të preken në mënyrë drastike nga këto masa.
