Klubi i Skënderebut ka vendosur që t’i mbajë të vlefshme biletat e takimit me Kukësin për ndeshjen e radhës të kampionatit pas njoftimit të Federatës Shqiptare të Futbollit se ndeshjet e sotme do të luhen me dyer të mbyllura.
Ky njoftim i FSHF-së erdhi pas vendimit të qeverisë për anulim deri më 3 prill të çdo aktiviteti sportiv, pas konfirmimit të dy rasteve me koronavirus në vendin tonë.
Përmes një postimi në faqen zyrtare në “Facebook”, Skënderbeu ka bërë me dije se këto bileta do jenë të vlefshme për takimin e radhës.
“Si pasojë e situatës së krijuar, Federata Shqiptare e Futbollit ka vendosur që takimi i javës së 26-të ndaj Kukësit të zhvillohet pa praninë e tifozëve. Sqarojmë tifozët të cilët kanë blerë biletë për takimin e sotëm se bileta do të jetë e vlefshme për ndeshjen e radhës në kampionat! Faleminderit për mirëkuptimin, KF Skënderbeu”-thuhet në postimin e Skënderbeut./Fjala.al/
