Kryeministri Edi Rama bëri me dije ditën e sotme se do të merren masa të reja për parandalimin e përhapjes së koronavirusit, pasi numri i të prekurve ditën e sotme ka shkuar në 23 persona.
Përmes një postimi në faqen e tij zyrtare në “Facebook” Rama ka shkruar se duke filluar nga ora 06:00 e mëngjesit ditën e nesërme do ndalohet lëvizja e mjeteve private brenda qytetit të Tiranës dhe Durrësit.
Ky vendim rrezikon zhvillimin e kampionateve shqiptare, pasi skuadrave u duhet që të udhëtojnë në qytete të ndryshme për të luajtur takimet.
Megjithatë nga Federata Shqiptare e Futbollit nuk është bërë ende një njoftim zyrtar se çdo ndodh me ndeshjet, apo nëse do ketë pezullim të kampionateve.
Ndërkohë, rikujtojmë se disa orë më parë skuadra e Laçit i kërkoi FSHF-së përmes një postimi në rrjetet sociale, që të shtyjë ndeshjet, pasi lojtarët dhe stafi janë shumë të ekspozuar ndaj këtij virusi të rëndë./Fjala.al/
