Qeveria e Britanisë së Madhe ka zbuluar një paketë të masave financiare për të ndihmuar ekonominë pas ndikimit nga koronavirusi. Ajo ka planifikuar një paketë prej 330 miliardë paund për kompanitë, për linjat ajrore, për bizneset dhe ndihmë për firmat e vogla.
Kancelari i Thesarit, Rishi Sunak tha në një konferencë për shtyp se kjo është një “emergjencë ekonomike. Asnjëherë në kohë paqeje nuk jemi përballur me një luftë ekonomike si kjo”.
Ai premtoi që nëse kjo paketë nuk do të ishte e mjaftueshme, do të rishikohej.
Kompani nga industritë e shërbimeve dhe linjave ajrore kanë paralajmëruar se mbijetesa e tyre është nën kërcënim.
Sunak tha: “Disa sektorë po përballen me sfida veçanërisht të mprehta. Në ditët në vijim, kolegu im, Sekretari i Shtetit për Transport, dhe unë, do të diskutojmë një paketë mbështetëse të mundshme posaçërisht për linjat ajrore dhe aeroportet.”
Kryeministri Boris Johnson tha gjatë të njëjtit njoftim për media se “duhet të bëjmë gjithçka që duhet për të mbështetur ekonominë”.
Ai shtoi:”Kjo është kohë për të qenë të guximshëm. Ne do të mbështesim punën, do të mbështesim të ardhurat, do të mbështesim bizneset … Do të bëjmë gjithçka që kërkohet”./BBC
