Ministria e Shëndetësisë e Shqipërisë është në kërkim të vullnetarëve në luftën me koronavirusin. Të gjithë mjekëve dhe infermierëve të licensuar, fizioterapistëve dhe teknikëve të laboratorit u bëhet thirrje që t’i bashkohen vullnetarisht stafit mjekësor që gjendet në vijën e parë të përballjes me COVID-19.
Aplikimi për të marrë pjesë si vullnetar mund të bëhet në faqen zyrtare të Ministrisë së Shëndetësisë.
Njoftimi
THIRRJE PËR Vullnetar
Situata e krijuar nga koronavirusi i ri është padiskutim një sfidë e një natyre të veçantë, që ka në zemër të saj bashkëpunimin e shumëanshëm me çdo individ. Në këtë çast, sistemi shëndetësor është i mobilizuar për të përballuar këtë situatë të pazakontë.
Mjekët dhe infermierët janë vendosur në vijën e parë të betejës. E megjithatë, çdo ndihmë shtesë që mund t’i vijë sot sistemit shëndetësor është padiskutim, e dobishme si kurrë më parë.
Ministria e Shëndetësisë dhe Mbrojtjes Sociale fton të gjithë mjekë të licensuar, infermierë të licensuar, fizioterapistë apo teknik laboratori/ imazherie si dhe të gjithë studentët e degëve të sipërpërmendura që ndjehen të gatshëm të kontribuojë në menaxhimin e situatës, sot është pikërisht dita për ta dhënë atë kontribut.
Çdokush që mendon se mund t’i japë një dorë sistemit shëndetësor është i lutur të aplikojë sa më parë sepse sa më parë ta fitojmë këtë betejë, aq më shpejt do mund t’i rikthehemi rutinës dhe normalitetit të jetëve tona.
