Ambasadori i Bashkimit Europian, Luigi Soreca ka zhvilluar një bisedë online me kryetarin e PD-së, Lulzim Basha lidhur me vendimin e javës së kaluar të Këshillit Europian për hapjen e negociatave për Shqipërinë.
“Bisedë e frytshme sot me Lulzim Bashën mbi bisedimet e pranimit pas vendimit të javës së kaluar të Këshillit Europian. Njohëm rëndësinë e reformave të bëra nga Shqipëria për të marrë dritën jeshile dhe u pajtuam se ato duhet të vazhdojnë duke pasur parasysh Konferencën e parë Ndërqeveritare. Kjo përpjekje e tërë shoqërisë do të ketë nevojë për bashkëpunimin dhe monitorimin e opozitës”, deklaron Soreca.
“Ne gjithashtu folëm për mbështetjen e BE-së për Shqipërinë në luftën e vazhdueshme kundër COVID-19 dhe në përpjekjet e rindërtimit pas tërmetit të nëntorit të kaluar,” theksoi Ambasadori i BE.
Nga anae tij, kreu i PD, Lulzim Basha e falenderoi Ambasadorin Soreca dhe BE për shprehjen e vullnetit pozitiv për çeljen e negociatave pas plotësimit të 15 kushteve.
“Partia Demokratike dhe opozita do të bëjmë çfarë kemi në dorë të kontribuojmë për këtë proces jetik për Shqipërinë dhe shqiptarët. Mirënjohje BE për ndihmën në luftën kundër COVID 19. Kemi shumë nevojë për mbështetje me pajisje mjekësore dhe ndihmë financiare për njerëzit dhe ekonominë për ta kaluar këtë krizë”, tha ai.
