Mjeku infeksionist Pëllumb Pipero në një lidhje me ‘Skype’ në emisionin reportv është shprehur se Shqipëria e ka kaluar pikun e koronavirusit. Mjeku është shprehur se java e re e cila ka filluar me numër të ulët, do të thotë se kemi të bëjmë me një trend në rënie të epidemisë në Shqipëri.
Megjithëse kemi një ulje të kurbës, mjeku Pipero tha se nuk duhet ulur vigjilenca për të shmangur një valë të dytë të infektimit.
“Një javë e re me më pak numra, dëshmon një trend të rënies së epidemisë në vendin tonë, shpresojmë që të vijojë kështu edhe pse është e pamundur për të bërë parashikime. Tani është java e tretë, kemi një rënie të numrave çka besoj fort se shkon në logjikën apo ecurinë e kësaj epidemie edhe në vendet e tjera dhe do të thotë se e kemi kaluar pikun dhe sheshpushimin dhe besoj se kemi filluar uljen. Ulja do të jetë graduale, gjysma e dytë e kësaj epidemie do të jetë më e gjatë në kohë, duhet të mos ulet vigjilenca,“-tha mjeku.
