Mjeku i njohur Pëllumb Pipero ka theksuar se duke nisur nga e hëna do të nisin analizat serologjike.
Këto analiza tregojnë nivelin e antitrupave Covid-19 në gjakun e personave.
Sipas mjekut të njohur, kjo analizë do të nisë ditën e hënë me stafin mjekësor në QSUT.
“Sapo më erdhi një njoftim që të hënën fillon analiza serologjike me personelin e QSUT dhe besoj edhe me personelin e COVID 2, për të parë ekspozimin dhe nivelin e mbrojtjes dhe për të ditur më shumë rreth situatës qarkulluese të virusit. Është një lajm shumë i mirë që duhet përshëndetur”, tha Pipero duke deklaruar që ky është një vendim i Ministrisë së Shëndetësisë.
“Besoj se në një javë analiza mund të merren të dhëna të rëndësishme për të marr vendime se si do të vazhdojë më pas”, u shpreh Pipero.
Kryerja e analizës serologjike, u sugjerua edhe nga ish-ministri i Shëndetësisë Leonard Solis, si një proces që ndikon në identifikimin e personave që kanë pasur kontakt me virusin.
