Kryeministri Edi Rama gjatë lidhjes së drejtëpërdrejtë nga ‘Facebook’, ku foli rreth lehtësimit të masave që pritet të vihen në zbatim javën e ardhshme, dha gjithashtu lajmin për të gjithë shqiptarët që punojnë me sezone në Greqi se në mes të muajit maj do të kenë mundësinë të udhëtojnë drejt vendit grek për të punuar.
Rama u shpreh se ka pasur një bashkëbisedim me kryeministrin e Greqisë, Kyriakos Mitsotakis, dhe ka diskutuar rreth rezultateve të deritanishme të masave që kanë marrë secili shtet dhe mundësive të lehtësit të tyre për një interes të përbashkët, për punësimet sezonale. Gjithashtu kryeministri Rama tha se të gjithë punonjësit sezonal që kanë mbetur në territorin grek dhe u ka mbaruar afati i qëndrimit nuk do të trajtohen si shkelës të afateve.
“Sot patëm një diskutim mbi strategjinë e fazës së dytë. Më parë u informoj se pas konsultimeve me miq dhe kolegë kam pasur një bashkëbisedim me kryeministrin grek për fazën e dytë. Diskutuam mbi rezultatet e deritanishme, strategjinë e testimit, lehtësimin e masave, planin e hapjes së sezonit dhe interesin reciprok për punësimin sezonal. E falenderova me gjithë zemër mikun grek për ata punonjës sezonal që mbetën matanë kufirit, por nuk u trajtuan si shkelës të afateve. Dakordësuam që të shohim problemin e lëvizjes së punonjësve sezonale sipas kalendarit të fazës së dytë dhe për nevojën reciproke që ti çelet rrugë rreth mesit të muajit maj.”,është shprehur Rama./Fjala.al