Masat kundër përhapjes së koronavirusit kanë ulur ndjeshëm nivelin e ndotjes dhe pluhurit në kryeqytetet botërore, përveç Romës.
Në kryeqytetin Italian, niveli i ndotjes përgjatë dy muajve të fundit është rritur me 30%. Këtë e konfirmon raporti i agjencisë së specializuar për ajrin, IQAir, në të cilin janë ballafaquar nivelet e ndotjes në qytet, për muajt mars-prill, me po të njëjtën periudhë të një viti më parë.
Por sipas Riccardo De Lauretis, përgjegjës për inventarin kombëtar të emisioneve të iSpra, të dhënat flasin edhe për ditët kur ka patur reshje shiu apo erë të fortë. Studimi është zhvilluar për tre javë rresht në Nju Delhi, Los Anxhelos, Londra, Madrid, Mumbai, San Paolo, wuhan, Seul, New York dhe Romë.
Në Wuhan, studimi është realizuar në periudhën 3 mars deri më 24 shkurt ndërsa në Romë kampionet janë marrë nga data 9 deri më 30 mars.
Por çfarë theksohet në raport? Niveli i pm, pra grimcave të pluhurit në ajër ka rënë me 60% në Nju Delhi, që është zyrtarisht qyteti më i ndotur në botë, me 54% në Seul dhe me 44% në wuhan.
Ndërsa në Romë nuk ndihet ky efekt i izolimit. Përkundrazi, niveli i ndotjes është rritur me 30%. Autoritetet vendore i justifikojnë shifrat me ndotjen nga përdorimi shtëpiak i sobave me dru apo pajisje të tjera shtëpiake, që gjatë periudhës së karantinës janë përdorur më shumë por edhe për shkak të prezencës në këtë periudhë të fenomeneve atmosferike, që kanë sjellë përqendrim më të madh të pluhurit, siç është edhe lagështira
