Mediat turke kanë raportuar sot për miratimin në Parlamentin e Shqipërisë të marrëveshjes për bashkëpunimin ushtarak midis dy shteteve.
Marrëveshja mori 96 vota pro, 2 kundër dhe 2 abstenim, ndërkohë që përmbajtja e saj është bërë shumë pak publike në media.
Dihet se shteti turk do të financojë procesin e ristrukturimit të Forcave të Armatosura Shqiptare, por pa dhënë më shumë detaje. Gjithashtu do të fuqizohet edhe më shumë bashkëpunimi ushtarak midis Shqipërisë dhe Turqisë.
Ndihma financiare që do i jepet ushtrisë shqiptare do të shtrihet në disa vite.
Marrëveshja dhe protokolli janë nënshkruar nga ministrja e Mbrojtjes, Olta Xhaçka, më 6 shtator 2019 në Tiranë dhe nga ministri i Mbrojtjes Kombëtare i Turqisë, Hulusi Akar, më 11 nëntor 2019 në Ankara.
Në shkurt të këtij viti mes Shqipërisë dhe Turqisë është nënshkruar edhe plani i bashkëpunimit në fushën e mbrojtjes për vitin 2020, me qëllim forcimin dhe intensifikimin e ndërveprimit në fushën e sigurisë dhe mbrojtjes.
