Pak ditë më parë në një intervistë për CNN, Dr.Anthony Fauci u pyet se cili aktor do të donte të luante rolin e tij në një film në të ardhmen.
Prezantuesja i dha edhe disa sugjerime, mes të cilëve Ben Stiller, Brad Pitt e të terë. Pasi qeshi, Fauci u shpreh: “Brad Pitt sigurisht”.
Epo, dëshira iu plotësua menjëherë. Në një dalje surprizë, Pitt u shfaq pikërisht në rolin e doktorit të famshëm, me një fjalim dedikuar popullit amerikan për krizën Covid-19.
“Së pari, dua të falenderoj gratë e moshuara në Amerikë që kanë kaluar kaq kohë duke më mbështetur frymëzuar e që ndonjëherë më kanë dërguar edhe grafika e emaile” tha Brad Pitt në rolin e doktor Faucit.
Më pas ai kërkoi të bëjë një sqarim edhe rreth situatës aktuale të koronavirusit dhe marrëdhënies me presidentin Trump.
I gjithë skeçi i dedikohej punës së doktor Faucit por edhe përplasjeve të tij të vazhdueshme me presidentin Trump për lehtësimin e masave.
Më pas, Pitt hoqi syzet e personazhit që imitoi dhe drejtoi një mesazh për të gjithë ata që e ndiqnin: “I drejtohem dr.Faucit, faleminderit për qetësinë tuaj dhe qartësinë në këtë kohë të paimagjinueshme” tha Pitt. “Faleminderit edhe stafit mjekësor, atyre që punojnë në ndihmën e parë dhe familjeve të tyre”.
Burimi: Click2houston, Përshtati: Fjala.al
