Virologu gjerman Christian Drosten është shprehur se po kërcënohet me vdekje për shkak të qëndrimeve që ai ka mbajtur mbi koronavirusin.
Drosten konsiderohet si një nga ekspertët më të mirë për të shpjeguar situatën lidhur me koronavirusin dhe kjo po i kushton shtrenjtë.
Gjatë një interviste për The Guardian, Drosten thotë se për shkak të mendimeve të tij të shprehura mbi krizën e koronavirusit, ai po kërcënohet vazhdimisht me vdekje.
“Njerëzit në Gjermani shohin që spitalet nuk janë të stërmbushura dhe nuk e kuptojnë se pse duhet të mbyllin marketet”, ka deklaruar Drosten.
Megjithatë ai pranon se masat preventive në luftimin e pandemisë së koronavirusit janë duke dhënë rezultate, por shumë njerëz po i shohin si reagime të tepruara në luftimin e COVID-19.
Ai beson se për shumë gjermanë ai është “njeriu i lig që po stopon zhvillimin ekonomik”, dhe se për këtë vazhdimisht kërcënohet me vdekje, të cilat natyrisht se i raporton në polici.
“Më të rënda se kërcënimet janë e-mailet që mi shkruajnë, se kanë fëmijë dhe po frikësohen për të ardhmen e tyre. Nuk është faji im, por këto e-maile nuk më lënë të fle natën”, është shprehur më tej Drosten.
