Detaje të reja janë zbardhur nga ngjarja e rëndë që ndodhi ditën e djeshme në zonën e Nishtullës në Shënavlash të Durrësit, ku u ekzekutuan me breshëri kallashnikovi brenda makinës së tyre dy vëllezërit Besmir dhe Viktor Haxhia të cilët vdiqën në vend.
Në vendin e ngjarjes duket se ka ndodhur një kasaphanë e vërtetë, ku plumbat kanë bërë ‘shoshë’ 5 makina të tjera të cilat kanë qenë parkuar deri në 50 metra distancë.
Ngjarjen e ka treguar roja i parkingut, i cili i shpëtoi mrekullisht këtij atentati sepse ia doli të shtrihej barkas.
“Isha këtu dje. U mbrojta duke qëndruar barkas. Unë pashë vetëm një makinë që po kalonte andej dhe dy veta që i shkonin nga pas. Makina ikte ngadalë kurse ata të dy shpejtonin. Plumbat kanë dëmtuar makina që kanë qenë në distancë edhe 50 metra”, tha për mediat roja i parkingut.
Si ndodhi ngjarja dje:
Dy vëllezërit cdhe Viktor Haxhia, 27 dhe 35 vjeç, janë ndjekur dhe kanë rënë pre e një prite, në lagjen nr 15 në zonën e NISHTULLËS, në Shënavlash të Durrësit, ku janë qëlluar me breshëri kallashnikovi brenda makinës së tyre Golf 6, me targa AA716ZZ.
Plumbat e shumtë që kanë tejshpuar xhamin e përparmë të makinës i kanë lënë ata të vdekur në vend. Vrasja e dyfishtë ka ndodhur te tregu i makinave, i cili njihet si tregu më i madh i makinave të përdorura në Shqipëri.
Policia ka sekuestruar pamjet nga kamerat e sigurisë që ndodhen në zonë, ndërsa pamjet tregojnë se vëllezërit janë qëlluar me breshëri nga dy persona.
Autorët e krimit po përdornin një makinë Toyota ngjyrë gri, por nuk është bërë i mundur identifikimi i tyre.
Policia ka shoqëruar rreth 40 dëshmitarë okularë, ndërsa hetimet vazhdojnë dhe janë ngritur postblloqe të shumta për ndalimin e autorëve.
Grupi hetimor ka bërë me dije se të dy vëllezërit ishin qëlluar në kokë dhe trup, ndërsa “një ekzekutim i tillë nuk është parë prej shumë kohësh”. Ndërkohë mësohet se policia ka sekuestruar edhe telefonat e viktimave. Për sa i përket zanafillës së vrasjes, dyshimet e para lidhen me një borxh për makinat. Nga të dhënat e para dyshohet se shkak i vrasjes ka qenë një borxh për makinat pas mosmarrëveshjeve për shit-blerjen.
