Ministri i Shëndetësisë, Arben Vitia është duke menduar dorëheqjen nga detyra pas vetëvrasjes së një 26 vjeçari në qendrën e karantinës në Prishtinë. Ai tha se ka menduar të dorëhiqet që dje, por për momentin është fokusuar në zbardhjen e plotë të ngjarjes, duke kërkuar edhe nga Prokuroria të realizojë hetime të thelluara.
26 vjeçari nga Gjilani u kthye të shtunën nga Gjermania dhe sipas rregullores, iu kërkua të karantinohej në qendrën e ngritur në Prishtinë për parandalimin e përhapjes së koronavirusit. Ai ka kundërshtuar të hyjë në qendër duke pretenduar se kishte edhe sëmundje të tjera.
Pasi hyri brenda ambienteve të qendrës, i riu u hodh nga kati i katërt çka i shkaktoi vdekjen e menjëhershme.
Ministri Vitia deklaroi sot se personi nuk kishte paraqitur asnjë dokument që vërtetonte probleme të tjera shëndetësore dhe se dërgimi në qendrën e karantinës është një praktikë që ndiqet për të gjithë të riatdhesuarit.
