Ai është shqiptari i vetëm që luan në Premier league, por është gjithashtu futbollisti shqiptar më i vlerësuar në vendin ku u shpik futbolli. Armando Broja është një “yll në ngjitje”, një lojtar për të cilin Chelsea shkeli të gjithë rregullat duke e promovuar para kohe në ekipin e parë, dhe këtë lojtari kuqezi e arriti me djersë në fushë.
Edhe pse i lindur në Slough, në Britaninë e Madhe, ai nuk e mendon se mund të pranojë kurrë një fanelë te “3 luanët” edhe nëse ia ofrojnë. 18 vjeçari që do vetëm Shqipërinë, u rendit në listën elojtarëve premtues të “Give Me sport” dhe shqiptari më i mirë në futbollin anglez. Armando Broja ka luajtur vetëm 4 minuta me Chelsea, në fitoren që “Blues” morën 4-0 ndaj Everton në mars. Më pas zbarkoi coronavirus dhe shpërtheu thuajse fundi i botës për futbollin, por trajneri Lampard e mban fort talentin kuqezi, dhe ka udhëzuar Blues ta përfshijnë dhe sezonin e ri në ekipin e parë.
Armando Broja është një nga talentet më të mëdha të vendit tonë, e ardhmja për fanelën kuqezi dhe këtë e ka treguar në Stamford bridge, dhe me kombëtaren Shpresa. Në ndeshjen me Everton u bë lojtari i parë shqiptar që luan në një ndeshje zyrtare me Chelsea por rekordi i tij para dy muajsh nuk u ndal me kaq. Broja u bë lojtari i 750 në histori që luan për ekipin e Chelsea, dhe kartoni i tij në treg vlen 10 milionë Euro, mjaftueshëm për një “sulmues race” që menaxhohet me sukses nga agjencia “First Access Sports”, krah emrave të njohur si Bertrand, Norman, Anjorin, apo Zymer Bytyqi, mbrojtësi shqiptar i Viking Stavanger në Norvegji.
