Ministri i Brendshëm, Sandër Lleshaj shpjegoi atë që për disa quhet tërheqje e tij ose mënjanim përgjatë situatës së pandemisë. Unë nuk jam tërhequr dhe nuk jam mënjanuar, por ka qenë një zgjidhje e punës në stafin tonë duke u lënë vend zëvendësministrave për të qenë ata protagonistë në disa dalje në ekrane. Në emisionin “HARD TALK” nga Roland Qafoku, ministri Lleshaj rrëfen:
Zoti ministër, kohët e fundit është vënë re një tërheqje juaj nga media. Ju nuk jeni natyrë shumë mediatike, por njerëzit, gazetarët e donin ministrin të dilte më shpesh.
“Në fakt besoj fort te një gjë, që duhet të jesh më shumë nga ç’dukesh dhe mos të dukesh më shumë nga ç’je. Këtë e kam parim, kjo më rregullon marrëdhëniet me median. Përsa i përket situatës së pandemisë kjo është një situatë ku kërkohet zëri i doktorëve, epidemiologëve,i specialistëve të shëndetësisë dhe e kemi lënë skenën për ta. Kemi bërë mirë që e kemi lënë për ta. Besoj se të gjithë janë të tërhequr. Në qasjen time në raport me publikun kam që të lë të flasin zëdhënësat. Kjo është e gjitha e organizuar.”
