Banorët katër fshatrave në Rrajcë të Madhe vijojnë protestat kundër ujësjellësit të ndërtuar në zonë, për shkak të problematikave që, sipas tyre, u ka shkaktuar. Ata akuzojnë autoritetet lokale se kanë devijuar projektin e ujësjellësit dhe kjo ka sjellë shkatërrimin e kanalit vaditës mbi 300 vjeçar. Sipas tyre, ky devijim është bërë vetëm për qëllime përfitimi të kompanisë private.
Banorët thonë gjithashtu se ujësjellësi ka bllokuar lëndinën e Rryenit, që është i vetmi vend për mbarështrimin e blegtorisë së katër fshatrave të Rrajcës.
Por këto nuk janë ankesat e vetme të banorëve. Ata pretendojnë se uji i pijshëm tani është bashkuar edhe me ujërat e zeza, duke përbërë rrezik të vazhdueshëm për ta.
Banorët e Rrajcës i janë drejtuar me një letër kryeministrit Edi Rama ku i kërkojnë shkarkimin e kryebashkiakut të Prrenjasit dhe i bëjnë thirrje Prokurorisë së nisë hetimet për ndryshimin e projektit të ujësjellësit.
