Në emisionin HARD TALK NGA ROLAND QAFOKU nënkryetari i PD Edmond Spaho dha arsyet përse PD duhet të vijë në pushtet.
Zoti Spaho, pse duhet t’iu besojmë juve?
Referojuni çfarë iu premtoi Rama në vitin 2013. Premtoi një vend me taksa të ulta. Ne po të japim alternativën që është tërësisht e ndryshme nga kjo e Edi Ramës. Krahasoni premtimet e Edi Ramës për një vend me taksa më të ulta, për shëndetësi falas, për infrastrukturë të zhvilluar, etj për të cilët i zhgënjeu qytetarët. Ka marrë 2 miliard euro borxh te PPP. Çfarë është realizuar me to përveç se janë ushqyer klientët dhe oligarkët. Nuk ka parë populli shqiptar asnjë përfitim nga ato dhe vazhdon të insistojë dhe t’i zbatojë ato deri në fund pavarësisht kushteve të vështira në të cilat ndodhen individët dhe ekonomia. Ne po iu themi që taksat janë të larta, duhen ulur dhe kemi premtuar që kur të vimë ne në pushtet taksa e sheshtë do jetë 9%. Tatimi mbi të ardhurat personale që sot është mesatarisht 15-23% , do jetë 9%. Ne e kemi pasur 10% nëse iu kujtohet dhe kemi mbledhur më shumë të ardhura nga këta në buxhetin e shtetit. Qytetarët gjykojnë nga ato që themi.
