Pas zbardhjes së draft-opinionit të Komisionit të Venecias për paketën “anti-shpifje” ku i kërkohej mazhorancës që ta rishikonte dhe njëherë, ka ardhur dhe reagimi i parë nga Presidenca.
Zëdhënësi i Presidentit Ilir Meta, Tedi Blushi përmes një reagimi në Facebook deklaron se u konfirmua qëndrimi i drejtë i Presidentit, duke renditur dhe 5 arsyet pse ajo është anti-kushtetuese.
Sipas tij, pa liri të shprehjes nuk ka demokraci dhe për rrjedhojë çelje të negociatave.
Postimi i plotë:
Ashtu sikundër pritej, Komisioni i Venecias ka konfirmuar qëndrimin e drejtë të Presidentit të Republikës Sh.T.Z Ilir Meta për paketën anti-kushtetuese të ligjeve “anti-shpifje”.
Siç është sqaruar edhe me dekretet e Presidentit Meta, këto ligje jo vetëm që nuk janë në harmoni, por bien në kundërshtim me:
– Parimet themelore kushtetuese të ndërtimit të një shteti demokratik, sigurisë juridike dhe të proporcionalitetit;
– Dispozitat kushtetuese që mbrojnë të drejtën e lirisë së shprehjes, të lirisë së shtypit dhe të drejtës së informimit;
– Jurisprudencën e Gjykatës Kushtetuese të Republikës së Shqipërisë, vendimet e së cilës përbëjnë norma të detyrueshme për zbatim;
– Nuk janë në harmoni me standartet e Konventës Evropiane të të Drejtave të Njeriut;
– Nuk janë në harmoni me jurisprudencën e Gjykatës Europianë të të Drejtave të Njeriut (GJEDNJ)
Pa garantuar lirinë e shprehjes nuk ka demokraci dhe nuk mund të ketë çelje të negociatave për anëtarësim.
LIRIA DHE PAVARËSIA E MEDIAS E PARA! ????
/E.B./Fjala.al
