Edhe pse dy partitë e mëdha opozitare PD dhe LSI e konsiderojnë marrëveshjen për reformën zgjedhore të mbyllur, nuk ka të njëjtin mendim kreu i Partisë Republikane Fatmir Mediu.
Ai shprehet se dakordësia mes mazhorancës dhe opozitës nuk do të garantojnë zgjedhjet që kërkohen prej vitesh. Gjatë një interviste për Report TV, Mediu tha se qeveria kujdestare do të ngelet domosdoshmëri, si dhe duhet diskutuar çështja e sistemit zgjedhor, pasi sipas tij ka një interes të drejtë nga ana e qytetarëve për rolin dhe funksionimin e parlamentit.
“Nuk ka një marrëveshje për reformën zgjedhore në gjykimin tim, por është një marrëveshje për administrimin e procesit me dy elementë shumë të rëndësishëm: Rikthimi te komisionet e balancuara për shkak se kishte një tentativë nga Rama që në emër të administratës të depolitizuar të kontrollonte komisionet zgjedhore dhe të garantonte fitore në tryezë dhe nga ana tjetër është identifikimi biometrik, i cili është një element pozitiv që shmang votimet familjare, votimin dy herë apo mbushjen e kutive të votimit. Kjo nuk e zgjidh problemin e zgjedhjeve të lira dhe të ndershme, do të ishte shumë naive nga ana ime, por dhe nga ana e opozitës për ta zgjidhur çështjen e reformës zgjedhore.
Mendoj që duhet garantuar vullneti politik për zgjedhje të lira dhe të ndershme prandaj nevoja e qeverisë Kujdestare është dhe do të ngelet domosdoshmëri. Një marrëdhënie mes forcave politike për të garantuar besimin e qytetarëve, për zgjedhje të lira dhe të ndershme, për njohjen e tyre dhe stabilitet politik që i shërben vendit por edhe integrimit evropian të Shqipërisë. Përveç asaj ka edhe çështje të tjera politike që janë lënë hapur për të diskutuar si çështja e sistemit dhe për derisa ka një interes të drejtë nga ana e qytetarëve për rolin dhe funksionimin e parlamentit, sa i përfaqëson realisht zërin e qytetarëve, do të ishte një çështje që opozita duhet ta trajtojë sa më shpejt, për të parë avantazhet dhe disavantazhet e saj. Ky është edhe qëndrimi I PR në kuadër të opozitës”, u shpreh Mediu./En.Br./Fjala.al
