“Është e papranueshme që një mjek apo një infermier të infektohet dhe të infektojë pacientët.” Kështu deklaron koordinatori i Spitalit Infektiv, Krenar Lilaj teksa flet për situatën e COVID-19 në vendin tonë ku kemi një rritje të ndjeshme të numrit të të infektuarëve ku një një pjesë e mirë e tyre janë bluza të bardha ose pacientë të QSUT-së.
Gjatë një interviste për emisionin “Repolitix”, Lilaj deklaroi se situata në QSUT nuk është e mirë dhe shtoi më tej se nëse qytetarët nuk do të ndërgjegjësohen, situata do të agravohet.
“Situata në QSUT nuk është e mirë për shkak të të sëmurëve të infektuar që janë rritur ditët e fundit. Si pasojë edhe humbjet e jetëve do të jenë më të mëdha. Nëse gjithkush nuk bëhet i ndërgjegjshëm për rrezikshmërinë e kësaj sëmundje, kjo situatë do të agravohet. Nuk do të reshtim së thëni që gjithkush duhet të marrë masat në mënyrë që të shmangë infektimet ndaj kësaj sëmundje, e cila përbën rrezik për vetë pacientin, por edhe për të tjerët. Dihet që kjo sëmundje është e transmetuar në ato mjedise ku ka grumbullim njerëzish. Spitali hyn në mjedise të tilla. Përgjegjësia e personelit mjekësor sa i përket profesionalizimit dhe rrezikshmërisë që mbart me vete personeli mjekësor është më e madhe. Megjithatë kemi të bëjmë me situata emergjente. Me manipulime apo trajtime të tilla që në momente të caktuara mund ta humbasësh kontrollit dhe mund të infektohesh. Është e papranueshme që një mjek apo një infermier të infektohet dhe të infektojë pacientët. Që në fillim të kësaj epidemie në vendin tonë ne kemi ndërtuar protokollet për masat mbrojtëse. Protokollet janë zbatuar, madje janë bërë edhe trajnime për personelin në QSUT”, u shpreh Lilaj./En.Br./Fjala.al
