Kreu i Partisë Bashkimi për të Drejtat e Njeriut, Vangjel Dule ka denoncuar se prej kohësh qytetarët shqiptarë, që janë pjesë e minoritetit etnik grek, po bëhen objekt i anti-terrorit.
Gjatë një interviste në emisionin “Zone e Lirë” Dule ka marrë rastin e ndodhur disa ditë më parë, ku për disa shkrime, u morën në pyetje nga anti-terrori në Fier pjesëtarët e këtij minoriteti, gjithashtu ka përmendur dhe rastin e ngritjes së një kryqi e cila sipas tij ndodhi e njëjta gjë.
“Do e bëjmë proces ndërkombëtar. Qytetarët shqiptarë, pjesëtarë të minoritet etnik grek, po bëhen objekt i anti-terrorit, ndërkohë që janë pjesë e një komuniteti me kriminalitetin zero. Nuk ka në radhët e minoritetit etnik grek pjesëtarë me qëndrime dhe politika të tilla.
Në një fshat u gjetën disa parrulla dhe u mor i gjithë fshati në pyetje nga anti terrori.
Hetimet bëhen sipas rregullave të shtetit të së drejtës. Kush e përjashton mundësinë që këto të jenë provokime? Hetimi të bëhet sipas ligjit.
Banorët e Himarës në një kishë ngrenë një kryq të madh dhe vënë flamurin bizantin dhe për këta njerëz nuk mjafton vetëm thirrja në Policinë e Himarës, por thirren një e nga një në Policinë e Fierit nga antiterrori. Ç’lidhje ka ngritja e një kryqi me antiterrori , ku është provokimi këtu? Është hera e dytë pas ’95-’97, që po aplikohen praktika të tilla”, ka thënë Dule./En.Br./Fjala.al
