Ka arritur në rreth 90 numri në total i fëmijëve të infektuar me COVID-19 në vendin tonë. Lajmin e ka bërë të ditur drejtoresha e repartit të Pediartisë në QSUT Gjeorgjina Kuli, e cila thotë se mosha më e prekur është 3-4 vjeç.
Ajo deklaron se deri tani nuk është regjistruar asnjë rast hospitalizimi i tyre, ndërsa shton se me hapjen e kopshteve dhe të çerdheve, ne jemi të përgatitur që të ofrojmë dhe ndihmën spitalore nëse ajo është e nevojshme.
“Numri i fëmijëve ka shkuar rreth 90, përgjithësisht kanë qenë asimptomatikë, dhe janë zbuluar thjesht nga kontaktet, ndërsa ata që kanë pasur simptoma, kanë qenë të ngjashme me ato të gripit.
Fatmirësisht nuk kemi pasur raste të hospitalizimit, ne kemi fëmijë që paraqiten çdo ditë në urgjencën tonë, të cilët i mbajmë të izoluar deri në përgjigjet e tamponëve. Në çdo rast kur është mundësia ne këshillojmë që fëmijët të qëndrojnë në kushtet e shtëpisë, asnjë fëmijë i infektuar nuk ka plotësuar kushtet që të hospitalizohet.
Me hapjen e kopshteve dhe të çerdheve, ne jemi të përgatitur që të ofrojmë dhe ndihmën spitalore nëse ajo është e nevojshme, pasi ne shërbejmë dhe për fëmijët që nuk janë te infektuar, reparti është i ndarë, dhe mundohemi të jemi sa më korrektë. Mosha më e prekur është ajo mbi 3-4 vjeç, por kemi pasur dhe një rast nën moshën 1-vjeç, por që fatmirësisht janë shëruar në kushtet e shtëpisë”, u shpreh Kuli për Fax News./En.Br./Fjala.al
