Mbi 500 mijë vetë kanë humbur jetën në mbarë globin që nga shpërthimi i pandemisë, sipas të dhënave zyrtare të publikuara nga Universitetit Johns Hopkins.
Një në 4 vdekje janë regjistruar në Shtetet e Bashkuara të Amerikës, sipas kërkuesve, teksa në vend janë regjistruar 2.5 milionë të infektuar, mes 10 milionë rasteve pozitive në mbarë botën.
Në vend të dytë për nga numri i viktimave renditet Brazili, i cili shënon 1 në 9 të vdekur nga koronavirusi, në totalin e 500 mijë viktimave, teksa shifrat zyrtare në këtë shtet janë 57 mijë të vdekur. Në vend të tretë qëndron Britania e Madhe me 43.634 të vdekur nga Covid-19.
Që nga 21 qershori, rastet e reja janë rritur me 1 milionë, ku Amerika Latina duket se është kthyer në epiqendrën e virusit. Ndërkohë ai ka shpërthyer ditët e fundit edhe në Indi, një nga shtetet me popullsinë më të lartë në botë, duke shënuar 500 mijë raste dhe mbi 16 mijë viktima.
Zyrtarët e shëndetësisë thonë se virusi është kthyer edhe më i fuqishëm në Amerikë, veçanërisht në zonat rurale. Vetëm 2 shtete, Rhode Island dhe Konektikat, kanë regjistruar ulje të rasteve të reja ndërsa në shtetet e tjera situata po bëhet gjithnjë e më alarmante, me shifrat në rritje të frikshme./Re.Gu/Fjala.al