Është shënuar një viktimë tjetër nga koronavirusi në Kosovë. Isuf Murati, 63-vjeç nga Gjilani ka ndërruar jetë në spitalin e Prishtinës. Lajmin e bëri me dije kryetari i Komunës së Gjilanit, Lutfi Haziri i cili ka shprehur ngushëllimet familjarëve.
Numri i përgjithshëm i të infektuarve në Kosovë ka shkuar në 2.878, ndërsa i viktimave në 52.
Postimi i plotë:
Fatkeqësisht në përballjen me pandeminë globale COVID-19, sot nga jeta është ndarë edhe qytetari i Gjilanit, i katërti në këtë pandemi, Isuf Murati. Nga njoftimi që kemi marrë prej Qendrës Klinike Infektive në Prishtinë, sot ishte një lajm i vështirë për të gjithë ne.
Ngushëllojmë familjen dhe garantojmë se do të jemi pranë tyre në këto ditë të vështira, sepse nuk e kanë të lehtë ballafaqimin me këtë ndarje nga më i dashuri i tyre. Ceremonia e varrimit do të organizohet nga Komuna e Gjilanit në kushte pandemie. Apeloj te të gjithë qytetarët ti respektojnë masat mbrojtëse sipas rekomandimeve të profesionistëve, maskat, dorezat, distanca, sepse janë baza e të jetuarit në përditshmërinë tonë.
Nuk duhet shmangur këto rekomandime sepse ky virus është një kërcënim i shëndetit publik. Mos jep shërbim dhe mos u shërbe askund, nëse nuk përdoren masat mbrojtëse. Kujdes maksimal për të gjithë kudo që jeni.
