Edhe këtë të enjte seanca parlamentare ka nisur me pak tension, ku që në fillim të saj, Kujtim Gjuzi i ka kërkuar kryetarit të Kuvendit që të mos ndërhyjë dhe të ndërpresë fjalën e deputetëve, pasi një gjë e tillë solli javën e kaluar, sipas tij, rebelimin në foltore të opozitarëve dhe bojkotin.
“Në seancën e kaluar pati një reagim më të ashpër nga deputetët e opozitës. Ajo që solli atë pështjellim ndërhyrja juaj me forcë, kur n/kryetari i Kuvendit kërkoi të replikojë me kryeministrin. Do ju lutesha që kjo mos të ndodhë”, u shpreh Gjuzi.
Por Gramoz Ruçi u përgjigj duke i thënë se nëse kanë vërejtje të ankohen te institucionet e Kuvendit dhe të kërkojnë mocion mosbesimi kundër tij.
“Vendimet që merr drejtuesi i përcakton rregullorja, kushdo që ka kontestime ka institucione Kuvendi ku mund të ankohen, mund të përdorni të gjitha mekanizmat deri në mocion mosbesimi për kryetarin e Kuvendit”, tha Ruçi./Bl.Ba/Fjala.al
