Barcelona ka konfirmuar që Antuan Griezmann ka pësuar një dëmtim muskulor dhe mund të mungojë në pjesën e mbetur të edicionit në La Liga. Futbolli i përfaqësueses franceze, kampion në fuqi i botës, sipas të gjitha gjasave, do të mungojë në dy ndeshjet e fundit të këtij edicioni. 29-vjeçari e filloi si titullar takimin e djeshëm ndaj Vajadolidit, por u desh ta linte fushën e lojës për shkak të një dëmtimi.
Trajneri i Barcelonës, Kike Setien, e konfirmoi pas ndeshjes të shtunën se francezi u zëvendësua për shkak se kishte ndjerë dhimbje, ndërsa konfirmimi erdhi nga klubi të dielën. “Testet këtë mëngjes treguan se lojtari i ekipit të parë, Antuan Griezmann ka një dëmtim muskulor”, – ka njoftuar klubi katalan në një komunikim të shkurtër për mediat mbi këtë çështje.
Barcelona e mposhti Vajadolidin në takimin e vlefshëm për javën e 36-të të kampionatit spanjoll të futbollit, për të vazhduar ndjekjen e Real Madridit në krye të tabelës, dy javë para fundit të sezonit. Një gol i Arturo Vidalit në minutën e 15-të i mjaftoi katalanëve për fitoren 1-0 në shtëpi. Në 36 ndeshje deri tani, Barcelona ka grumbulluar 79 pikë, një më pak se Reali që kryeson, por që ka një ndeshje më pak të zhvilluar.
