Mbrëmjen e sotme pritet të mbahet një koncert në Amfiteatrin e Tiranës duke bërë bashkë ikonat e muzikës shqiptare.
Do të performohen live këngët më të bukura nga vitet ’60 deri në fund të viteve ’90 kushtuar dashurisë nga emrat më të njohura të muzikës si Bashkim Alibali, Luan Zhegu, Irma Libohova, dhe Liljana Kondakçiu.
Pak para koncertit, ata u pritën në një takim nga kryetari i Bashkisë së Tiranës, Erion Veliaj, i cili u bëri thirrje qytetarëve të jenë të pranishëm, duke respektuar protokollet e sigurisë dhe distancën.
“Jam shumë i lumtur që në darkë, pas një dite të lodhshme pune, do ta mbyllim tek Amfiteatri i Liqenit me Bashkim Alibalin e madh, me Luan Zhegun, me Irma Libohovën, me Liljana Kondakçiun, me këngët e gjeneratës së tyre dhe këngët e tyre, por edhe me këngë të vjetra të miksuara, që i dedikohen shumë artistëve të cilët, ose nuk janë më mes nesh, ose jetojnë jashtë vendit. Fatmirësisht, tek Amfiteatri kemi mundësi ta ruajmë distancën sociale, por edhe mund të shpërndahemi në të gjitha rrethinat përreth amfiteatrit për këngët e dashurisë, për këngën shqip, për atë që kemi më shumë nevojë në këto kohë. Patjetër, kemi nevojë për infrastrukturë në qytet, për investime, por kemi nevojë edhe për kulturë për shpirtin”, tha Veliaj.
Kujtojmë se mbrëmjen e 11 korrikut artistët Gena, Fatmira Breçani, Irini Qirjako, Valbona Mema, Kozma Dushi, Liri Rasha dhe Vaske Curri dhanë koncert në skenën e Amfitetarit. /Ra.My. Fjala.al/
