Policia ka dhënë detajet e kapjes së një sasie të konsiderueshme lënde narkotike në pikën kufitare të Bllatës në Dibër.
Uniformat blu bëjnë me dije se janë sekuestruar 370 kg lëndë e dyshuar narkotike kanabis dhe për pasojë është vënë në pranga drejtuesi kamionçinës, shtetasi F. A., 26 vjeç, banues në Gjoricë e Poshtme, Bashkia Bulqizë. Sipas burimeve zyrtare droga kishte si destinacion Maqedoninë e Veriut.
“Shërbimet e Policisë Kufitare kanë përzgjedhur për kontroll të detajuar në vijë të dytë në dalje të Republikës së Shqipërisë, mjetin kamionçinë tip “Benz”, me drejtues shtetasin F. A., 26 vjeç, banues në Gjoricë e Poshtme, Bashkia Bulqizë, i cili kishte si destinacion Maqedoninë e Veriut. Gjatë kontrollit, shërbimet e Policisë kanë konstatuar të fshehur në brendësi të kamionçinës lëndë narkotike.
Kontrolli ka vijuar nga grupi hetimor dhe Specialistët për Hetimin e Narkotikëve në DVP Dibër, ku gjatë kontrollit të imtësishëm u gjet e fshehur një sasi prej 370 kg lënde e dyshuar narkotike kanabis , e cila u sekuestrua në cilësinë e provës materiale. Në përfundim të veprimeve të para hetimore , Specialistët për Hetimin e Narkotikëve në DVP Dibër , bënë arrestimin në flagrancë të drejtuesit të kamionçinës .” thuhet në njoftimin e policisë.
Hetimet vijojnë për dokumentimin e plotë të skemës së tentativës së trafikimit ndërkombëtar të narkotikëve, identifikimin dhe kapjen e personave të tjerë të implikuar në këtë ngjarje.
Materialet procedurale i kaluan Prokurorisë së Rrethit Gjyqësor Dibër për veprime të mëtejshme.
/En.Br./Fjala.al
https://youtu.be/7B5G1WPrL3w