Një 39-vjeçar shqiptar është ekstraduar paraditen e së martës drejt Kanadasë, ku ishte shpallur në kërkim si përgjegjës i një askidenti ku kishte humbur jetën një shtetase kanadeze në vitin 2014, në Richmond, Kanada.
Ai është arrestuar 1 vit më parë në vendin tonë dhe pas procedurave ligjoe të ndjekura në Shqipëri ai është ekstraduar në bazë të urdhër-arrestit të datës 15.06.2018 të Gjykatës British Columbia.
Njoftimi i plotë
Interpol Tirana vijon bashkëpunimin me homologët, për kapjen dhe ekstradimin e personave të shpallur në kërkim ndërkombëtar.
Si rezultat i këtij bashkëpunimi, ditën e sotme, nga Interpol Tirana është bërë ekstradimi nga Republika e Shqipërisë drejt Kanadasë, i shtetasit shqiptar E. K., 39 vjeç.
Ky shtetas ishte shpallur në kërkim ndërkombëtar nga autoritetet kanadeze të drejtësisë, bazuar në urdhër-arrestin e datës 15.06.2018 të Gjykatës British Columbia, Kanada, si person nën hetim për veprën penale “Neglizhencë me pasojë vdekjen”, parashikuar nga Kodi Penal kanadez.
Përmbledhje e ngjarjes së ndodhur:
Në vitin 2014, në Richmond, Kanada, ky shtetas, duke drejtuar një automjet tip kamion, ka përplasur shtetasen C. M., e cila për pasojë ka gjetur vdekjen.
Gjykata e British Columbia, Kanada, më datë 25.06.2018 ka vendosur masën e sigurisë “Arrest në burg”, për shtetasin shqiptar E. K.
Ky shtetas është arrestuar në vendin tonë më datë 17.07.2019, me qellim ekstradimin drejt Kanadasë.
Autoritetet gjyqësore shqiptare kanë dhënë miratimin për ekstradimin nga Republika e Shqipërisë në drejtim të Kanadasë të shtetasit E. K., i cili iu dorëzua oficerëve të policisë kanadeze në aeroportin “Nënë Tereza” Rinas./ Ar.Ha /Fjala.al
