Tashmë u bënë disa muaj që mbarë bota po jetojnë me pandeminë, kështu që dhe rregullat kryesore për të ruajtur veten dhe të tjerët janë bërë pjesë e rutinës sonë.
Por në të vërtetë ajo që duhet theksuar është fakti se nuk vlen vetëm pastërtia vetjake, pasi e rëndësishme është edhe dezinfektimi i ambienteve të përbashkëta që ndajmë me të tjerët.
Një shqetësim i tillë është ngritur së fundmi nga Sorina Koti, pedagoge në Universitetin e Korçës.
Përmes një postimi në Facebook ajo kërkon nga institucionet përkatëse, si dhe Bashkia që të dezinfektohet qyteti, tavolinat, karriget baret dhe çdo ambjent tjetër publik.
“Prej kohësh Korça është kthyer në një vatër COVID-19. Më shqetësuesja, të cilën e kërkoj me forcë, është pastrimi dhe dezinfektimi i qytetit, i ambienteve publike, bareve, restoranteve, bizneseve etj…
Kudo që shkon nuk sheh askund të dezinfektohen tavolinat, karriget, ambientet e përbashkëta… Ku është Bashkia dhe institucionet përgjegjëse? Ku janë fondet e emergjencës për Pandeminë?
Duket, që situatën me vetëdije, e kanë lënë në rënie të lirë! Nëse nuk dini, mësoni nga vendet fqinje, atje ku dezinfektohet çdo ambient, çdo karrige, çdo shezllong, çdo tavolinë!”, shkruan Sorina Koti./Bl.Ba/Fjala.al
