Të dhënat e Institutit të Sigurimeve Shoqërore dëshmojnë se vetëm 43.418 fermerë në të gjithë vendin kanë paguar sigurime shoqërore në buxhetin e shtetit dhe rezultojnë si të vetëpunësuar në bujqësi në gjysmën e parë të vitit.
Shifrat flasin ndryshe nga pretendimeve të qeverisë për një ecuri pozitive të sektorit të bujqësisë gjatë periudhës së COVID 19.
Kujtojmë se në fund të 2019, në skemë ishin kontribuues 61.563 fermerë. Pra, në harkun kohor të 6 muajve, 18 145 fermerë kanë ndërprerë derdhjen e sigurimeve shoqërore.
Pjesa dërrmuese e fermerëve që paguajnë sigurime i përkasin zonave fushore, me 69.2% të totalit, ndërsa të dhënat e detajuara tregojnë se numri më i lartë i kontribuuesve të vetëpunësuar në bujqësi si përqindje ndaj totalit, regjistrohet në Tiranë, pasuar nga Fieri dhe Durrësi.
Bujqësia i ndjeu efektet e pandemisë veçanërisht gjatë periudhës së karantinës, ku pati probleme me transportin e produkteve bujqësore nga serat në treg, për shkak të kufizimit të lëvizjeve. Ndërkohë që rritja e kësaj dege të ekonomisë ka qenë modeste edhe në tremujorin e parë të vitit, me një kontribut prej vetëm 0.7% në rritjen e Prodhimit të Përgjithshëm Kombëtar.
La.Mi/Fjala.al
