Ditën e djeshme ish-kryetarja e Kuvendit Jozefina Topalli publikoi një status në Facebook dhe për këtë u pyet gjatë emisionit HARD TALK NGA ROLAND QAFOKU. Ishte një pjesë e nxjerrë nga një nga librat e profesor Ernest Koliqit, një nga penat më cilësore të Shkodrës dhe të gjithë Shqipërisë dhe që bënte fjalë për një histori personale mes kryeministrit Hasan Prishtina dhe kundërshtarëve të tij politikë në media. Kërkesës së një miku për t’i dhënë një dru gazetarit që shkroi keq për Prishtinën iu përgjigj se kur nuk të sulmojnë është problemi. Ja statusi i zonjës Topalli.
Nji anmik në ditë
Tue bisedue para shum kohe me nji të dashtun t’émin, shqiptar mendjesquet e i rysun nëpër ngjarje të ndërlikueme të historis shqiptare, ra fjala mbi grindjet qi e shuejnë ndér né në perpjekjen në daç politike në daç shoqnore e letrare. E më tregoi se nji herë në Tiranë Hasan Prishtina, atdhetari i njoftun kosovar, ishte qenë sulmue keqas nga nji gazetar me nji artikull plot kritika t’ashpra. Hasan begu kishte do djelm si petrita mbas vetes. Njâni prej tyne, si mori vesht sulmin e pësuem nga zotnija i vet, i tha: – “Beg, m’ep léjen të shkoj e t’i ap nji drû të shëndoshtë atij edepsyzit qi na ka dokanisë aqë randë.. “. Atdhetari i Prishtinës i u përgjigj: – “Moré budallë, atij duhet t’i jemi mirnjohës. Deri sa bota më shajnë ndër gazeta e kafehaneve don me thânë se dishka vlej. Atëherë kur mos të flasin mâ kush për té, nji njeri politiket ka mbarue… “.
Lazër Shantoja thonte: – ” Për m’u bâ njerí i madh në Shqipni, duhet me fitue s’paku nji anmik në ditë. Gjindja kur ndigjojnë se dikush shahet pajadá e me ngulm, fillojnë e brehen nga kureshtja m’e njoftë, me dijtë pse përmendet e pse urrehet me aqë furí. Fitó nji anmik në ditë dhe syt e botës kanë m’u sjellun kah ti… “.
Ernest Koliqi
E pyetur për këtë status në emision HARD TALK NGA ROLAND QAFOKU, Topalli tha se ishte e vërtetë që kështu funksionon Shqipëria politike. Por se ajo vetë e ka më të theksuar sepse ka lindur armike. Topalli ka qenë pjesë e një familje të persekutuar në Shkodër e cilësuar si armike e pushtetit gjatë diktaturës së Enver Hoxhës.
-Më ka pëlqyer statusi që kishit publikuar dje në Facebook.
-Në fakt historia e Shqipërisë nuk ka ndryshuar shumë. Të gjitha janë të urdhëruara në një listë emrash të caktuar. Kjo më shton dhimbjen për PD. Kurrë nuk ka funksionuar kështu PD. Për të quajtur tjetrin armik. Unë nuk quaj asnjërin armik. As ata që janë në qeveri, as ata që janë në pseudo-opozitë, unë mund të kem kundërshtime me ta.
-Po Lulzim Bashën çfarë e quani?
-Kurrë armik. Është një njeri që ka marrë peng PD. Unë nuk i them dot armik, është prapë shqiptar. Unë mund ta kritikoj, unë do të vazhdoj të flas. Kur i lexon sulmet të dirigjuara nga zyra e kunatit dhe nga call centerat e kunatit, mua më vjen të qesh. Unë kam lindur armike, kam lindur duke më quajtur armike. Unë nuk e kuptoja në fakt. Babai im më ka thënë disa herë që ti duhet të kuptosh pse na quajnë armiku i popullit. Po pse babi, i thosha, çfarë kemi bërë ne? Kështu që për ne nuk është diçka e re. Ndonjëherë më duket mjerim i madh dhe dhimbje e madhe për atë që ka qenë PD.
-E ju e keni ndjerë të sulmuar veten?
-Të gjithë janë angazhuar te Jozefina Topalli, jo në atë që është thelbësore për vendin, në ndryshimin, sepse nuk mund ta bëjnë. /Fjala.al/Ke.Ba
