Në prillin e vitit ’60-s, nga një ndërtesë njëkatëshe në krah të Rrugës së Kavajës, bashkë me emisionin e parë historik televiziv, u shfaq dhe një folëse, një imazh që u bë shumë shpejtë i gdhendur në memorien e teleshikuesit shqiptar të asaj kohe.
“Të dashur teleshikues, Televizioni eksperimental Shqiptar fillon emisionin e tij të parë ”, ishte fraza me të cilën ajo iu drejtua teleshikuesve të pakët.
Ka kaluar gati gjysmë shekulli, kur një vajzë e re, u pa në ekranin shqiptar dhe për dekadat që vijuan do të krijonte ikonën e televizionit kombëtar.
Ndonëse në vite folëset do të ndryshonin, të tjera do ta pasonin. Shprehja “Të dashur telespektatorë mirëmbrëma, po fillojmë transmetimet”, do të mbetej unike dhe e pandryshuar.
Fytyra të bukura, simpatike, brune e bionde, me një buzëqeshje natyrale, me një zë melodioz, qëndrim karakteristik, me një shqiptim korrekt, kështu kanë mbetur në memorien e publikut televiziv disa emra të spikatur të atyre viteve.
Mimoza Tafaj ishte njëra prej tyre. Figurë e rëndësishme në vitet e televizorëve bardhezi të markave “Butrinti”, “Dajti” e “Lura” prodhim të URT-së, ku shfaqej vetëm një kanal: TVSH
Mimoza Tafaj Prej kohësh në Tiranë, por në një kohë të caktuar edhe ajo si shumë emra të tjerë të njohur si artistë apo personazhe publike të asaj kohe do të merrte vendimin të largohej nga Shqipëria duke zgjedhur të shkonte në kontinentin e largët, Amerikë, ëndrrën e shumë shqiptarëve për atë kohë, ku edhe jeton prej shumë vitesh.
