Lajmi më i mirë financiar i këtij viti është vendimi i qeverisë për rritjen e pagave të mjekëve, infermierëve dhe mësuesve. Ministrja e Financave dhe Ekonomisë Anila Denaj tha gjatë emisionit “Hard Talk nga Roland Qafoku” se kjo rritje shkon deri në 40%.
“Roland, ju e keni lëvizjet e profesioneve si mjekë, infermierë në rajon. Unë do ju ftoja të shikonit Bullgarinë, do ju ftoja të shikonit Maqedoninë e Veriut edhe Serbinë deri diku, por të paktën këto dy të parat. Ju do të shikoni që ka një fluks të largimeve edhe nga Bullgaria edhe nga Maqedonia e Veriut drejt tregjeve… Në fund po flasim për një atraksion i cili sado mund të vendosë rritjen e pagave 40%, unë nuk do ta konkurroj dot.
Pse? Sepse rrogat që një treg pune si Gjermania e ofron nuk mund të krahasohet me rritjen e pagave që buxheti jonë e mundëson dhe kjo edhe për një element tjetër. Ne vërtetë po bëjmë një rritje të rëndësishme, por ne duhet të kemi një hierarki strukture pagash sepse po aq të rëndësishëm janë edhe arsimtarët, po aq të rëndësishëm janë edhe policët. Pra, të gjitha strukturat të cilat janë në shërbim të popullsisë, kanë dhe vendosen në një hierarki pagash dhe rritje pagash që duhet të jenë proporcionale”, tha Denaj.
Ndërsa shtoi se, “Folëm për 21% para disa vitesh për mjekët dhe 23 për infermierët dhe nuk është një rritje e vogël, dhe tani po flasim për 40%. Ajo që po them është që nuk mund të shkohet vetëm në rritje të pagave të mjekëve pa krahasuar dhe rritjen e të tjerëve. Është dhe arsimi”./Jo.Be/Fjala.al
