Ministrja e Shëndetësisë, Ogerta Manastirliu reagon lidhur me infektimin me koronavirus të shefes së epidemiologjisë në Institutin e Shëndetit Publik, Silva Bino, e cila prej tre ditësh është shtruar në spital.
Manastirliu i uron shërim të shpejtë profesoreshë Silva Binos, për të cilën thotë se po trajtohet me kujdes e profesionalizëm nga kolegët e saj në spitalin Infektiv në QSUT.
“Mjekët konfirmojnë se gjendja e saj është e stabilizuar. Dr. Bino të presim të na bashkohesh sa më parë. Bashkë”, shkruan ministrja.
Që prej marsit kur u shpërtheu pandemia doktoresh Bino është një ndër figurat kryesore e angazhuar në përballimin e pandemisë së koronavirusit.
Bino eshte dhe pjese e komitetit teknik, nga ku dalin vendimet për përballimin e pandemisë.
Ndërkohë kujtojmë se Ministria e Shëndetësisë tha pasditen e djeshme, se në spitalin Infektiv dhe “Shefqet Ndroqi” po trajtohen 182 pacientë, 18 në terapi intensive nga të cilët vetëm 5 pacientë janë të intubuar. Raste Aktive me Covid-19 janë 5348, ndërsa numri i viktimave ka shkuar në 377./Bl.Ba/Fjala.al
