Është shtyrë seanca në Gjykatën e Posaçme për kreun e OFL, Artan Shkëmbi, të cilit do t’i komunikohej masa e pezullimit.
Burime nga Policia e Shtetit thonë bëjnë me dije se përveç Artan Shkëmbit, SPAK ka kërkuar të dhëna edhe për dy oficerë të tjerë në Policinë e Shtetit si të dyshuar të përfshirë në nxjerrjen e sekretit hetimor.
Në pyetje janë marrë dy agjentë të cilët kanë kërkuar në TIMS të dhënat e dy personave për të cilët Gjermania kishte kërkuar informacione për pasurinë e tyre.
Edhe pse Prokuroria e Posaçme ka bindjen që këta oficerë së bashku me kreun e OFL Artan Shkëmbin kanë nxjerrë sekretin hetimor, tre punonjësit e policisë kanë pohuar se kërkimin në TIMS e kanë bërë për shkak të detyrës që ata kishin.
Hetimi ka nisur që në prill pas informacioneve të mbërritura nga Gjermania. Artan Shkëmbi, kreu i Operacionit Forca e Ligjit u pezullua nga detyra me firmë të drejtorit të përgjithshëm të Policisë së Shtetit, Ardi Veliu.
Partnerët ndërkombëtarë dërguan informacione pranë Prokurorisë së Posaçme se Shkëmbi është i lidhur me dekonspirimin e operacioneve në nxjerrjen e sekretit hetimor dhe korrupsion./Bl.Ba/Fjala.al
