Një gomone me një sasi prej 1 ton e 200 kg kanabis është kapur nga rojet bregdetare në zonën Marmario Mani në Greqi.
Mediat greke shkruajnë se të hënën në mëngjes oficerët e rojës bregdetare pikasën një gomone në një zonë shkëmbore të Peloponezit.
Mësohet se transportuesit e drogës kanë pritur momentin e duhur, larg syve kureshtarë, për të marrë ngarkesën e paligjshme në territorin e vendit dhe prej andej për ta transportuar përmes rrugëve tokësore.
Rojet bregdetare arrestuan drejtuesin e gomones, ndërsa personat e tjerë arritën të largoheshin.
Mediat shkruajnë se kostoja e sasisë së drogës së konfiskuar, referuar vlerësimeve fillestare, tejkalon 2 milion Euro.
Gomonja ishte ngarkuar me drogë në brigjet e Shqipërisë nga ku ishte nisur për në një destinacion të panjohur.
