Kryeministri Edi Rama ka vijuar me batutat e tij ndaj kreut të PD-së, Lulzim Basha.
Ndërkohë që ishte në Xhafzotaj të Shijakut, për të inspektuar rindërtimin e shtëpive të dëmtuara në këtë zonë pas tërmetit, Rama ka vënë re se kryetari i Bahskisë së Shijakut, Elton Arbana, e mbante maskën, por kishte lënë hundën jashtë.
Kryeministri i ka bërë një krahasim me Lulzim Bashën duke i thënë: “Tani këtë maskën o veje o mos e vej. Maska është edhe për hundën, mos u bëj si Luli që lë hundën jashtë.”
Kujtojmë se kryeministri Rama ndodhet sot në Xhafzotaj të Shijakut ku bën me dije se mbi 500 banesa po marrin formë dita-ditës për familjet që do të rikthehen në shtëpi të reja, të cilat s’kanë krahasim me ato që humbën nëntorin e shkuar.
Më herët kryeministri Rama është shprehur se 4000 familje do të marrin shtëpinë e tyre, falas dhe do të gëzojnë vitin e ri në banesat e tyre të reja.
Gjithashtu, kryeministri theksoi se qyteti i Shijakut, për Ramën do të kthehet në një zonë potenciale ekonomike e turizmi falë rindërtimit.
Shijaku është një ndër epiqendrat e vazhdueshme të lëkundjeve sizmike të nëntorit të kaluar, që pësoi dëmtime të mëdha në banesa private dhe pallate.
Lagjja “Lugina”, e rrënuar tërësisht nga kjo fatkeqësi natyrore, do të ketë një pamje tërësisht të re. Banorët e mbetur të pastrehë nga tërmeti shkatërrues i 26 nëntorit, tregojnë se këto muaj kanë qenë të vështirë, por mbeten me shpresën që ndërtimi i banesave të reja të bëhet sa më shpejt./Bl.Ba/Fjala.al
