Kryeministri Edi Rama, ka reaguar pas takimit të sotëm me ministrin e Jashtëm grek, Nikos Dendias në Tiranë.
Rama është shprehur se gjatë diskutimeve me Dendias, është vendosur se për çështjen e detit do ti drejtohen Drejtësisë Ndërkombëtare.
“Me ministrin e jashtëm të Greqisë, Nikos Dendias, ramë dakord që për çështjen e detit t’i drejtohemi Drejtësisë Ndërkombëtare, ndërkohë që jemi më afër se asnjëherë heqjes së Ligjit të Luftës, çka përbën edhe një kthesë përfundimtare në historinë e marrëdhënieve tona” shkruan kryeministri në Facebook.
Shqipëria dhe Greqia kanë rënë dakort që këtë çështjen kufijve detarë dhe përcaktimit të Shelfit Kontinental dhe Zonave Ekonomike Ekskluzive, duhet ta zgjidhi drejtësia ndërkombëtare.
“Kemi rënë dakord që këtë çështje ta trajtojmë në instancat ndërkombëtare, së bashku Shqipëria dhe Greqia do i drejtohen drejtësisë ndërkombëtare për të vendosur pikat mbi i, në bazë të ekspertizës dhe në bazë të të drejtës ndërkombëtare të detit”, u shpreh më herët kryeministri.
Kujtojmë se marrëveshja e Detit, që shpresohet të arrihet, ka një precedent në vitin 2009 Gjykata Kushtetuese (GJK) hodhi poshtë Marrëveshjen e Detit mes Shqipërisë dhe Greqisë, të arritur në kohën, kur në pushtet ishte opozita e sotme jashtë parlamentare. /Ra.My.Fjala.al/
