Prej disa javësh Partia Socialiste dhe lidershipi i saj kanë ngritur tonet ndaj presidentit Ilir Meta dhe anasjelltas. Në këtë duel ka një palë të tretë që duket sikur rri e vështron. Fjala është për kryetarin e Partisë Demokratike dhe të opozitës Lulzim Basha. A duket kjo si një ndryshim kursi dhe marrëdhëniesh mes PS dhe PD? Përgjigjia kësaj pyetje vjen në një formë tjetër nga sekretari organizativ i PS Arben Pëllumbi. Gjatë emisionit HARD TALK NGA ROLAND QAFOKU, Pëllumbi tha se Basha është moderuar në sjelljen e tij.
-Betejën e keni me Ilir Metën apo me PD?
-Ne betejën e kemi me të gjithë ata të cilët i vendosen përballë PS dhe bëjnë ç’është e mundur që ne të mos fitojmë mandatin tonë të tretë. Në këto momente presidenti ka dalë për ne nga kostumi i presidentit dhe ka marrë rolin e një krye-opozitari. Për sa kohë na akuzon, për sa kohë na sulmon politikisht, sigurisht që edhe ne do t’i japim përgjigjet tona, mendimet tona, opinionet tona, në raport me ato që thotë dhe me ato që bën. Nuk është përmendur në rolin e tij të presidentit por si opozitar dhe kundërshtar i PS. Dhe në këto kushte Basha ka qenë më i maturuar dhe më i pjekur në këtë periudhë. Sigurisht ai ngelet kundërshtari jonë i drejtpërdrejtë. Po të kemi parasysh që udhëhoqi një vit përpara gjithë ato demonstrata me molotovë, sigurisht në këtë sens sot i është drejtuar institucioneve./Fjala.al/Ke.Ba
