Kryetari i Grupit Parlamentar të Partisë Socialiste, Taulant Balla, si propozues i projektrezolutës ”për miratimin e përkufizimit të përdorshëm për antisemitizimin përcaktuar nga Aleanca Ndërkombëtare për Përkujtimin e Holokaustit”, tha se “ajo që po diskutojmë e do marrë formën zyrtare të qëndrimit që Kuvendi merr në luftën kundër antisemitizmit besoj se është pjesë e ADN sonë si popull”.
Sipas Ballës, “shqiptarët shpëtuan hebrenjtë e Evropës, të rrezikuar e përndjekur në kontinentin mëmë, shqiptarët shpëtuan hebrenjtë, qytetarët e asaj Evrope që po kërkojmë ne sot të bëhemi pjesë.
Evropa sot është thellësisht e ndryshme nga Evropa e luftes se dyte boterore, është bashkësi pa kufinj, multietnike, multikulturore, fetare e gjuhësore.
Shqipëria nëse një ditë, e jam i sigurt që jemi në rrugën e duhur, do jetë ulur në tryezën e barabartë të vendeve anetare të BE, do pasurojë aty shumë vlera, por dy janë të pakundërshtueshme:
E para humanizmi e mbrojtja e tjetrit në rrezik dhe e dyta toleranca fetare, pasaporta jonë më e mirë evropiane”, tha Balla.
Sipas tij, “Një meritë të veçantë ka dhe një mik shqiptar I atyre viteve ambasadori i SHBA-ve në Tiranë Herman Bernshtajn për instalimin në diplomacinë mbretërore të Shqipërisë të një ndjenje simpatie dhe të një përgjegjësie mbrojtjeje ndaj hebrenjve. Në ditën e sotme ne nderojmë edhe veprën e tyre të shkëlqyer, në favor të hebrenjve të Gjermanisë, Austrisë, Polonisë dhe të disa vendeve të tjera, të cilëve iu hap rruga për të ardhur lirisht e legalisht në Shqipëri.
Brenda më pak se një dhjetëvjetëshi pas shpërthimit të urrejtjes anti-semite me doktrinën naziste final solution (1932) numri i hebrenjve në Shqipëri u dhjetëfishua. Periudha e dytë e shpëtimit të hebrenjve është ajo e vetë luftës.
Si deputet i Elbasanit dhe Librazhdit , në zonën që kam pas nderin të përfaqësoj ka dëshmi të mbrojtjes së hebrenjve. E tillë është rasti i fshatit Qarrishtë, ku familja Biçaku strehoi 26 hebrenj gjatë Luftës së Dytë Botërore. Një dëshmi rrënqethëse dhe kuptimplotë që evidenton mbrojtjen e mikut në çdo rrethanë edhe me jetë“.
Çka është e rëndësishme të theksohet shprehet Balla “është fakti që në fund të luftës listat që gjenden në arkivat e Shqipërisë përmbajnë 3750 emra. Populli shqiptar nuk shpëtoi hebrenjtë e vet, ata ishin të vetët qëkuri, shqiptarët shpëtuan hebrenjtë e Europës, hebrenjtë e rrezikuar e të dëbuar, hebrenjtë e përndjekur në kontinentin mëmë.
Shqiptarët shpëtuan hebrenjtë, qytetarë të asaj Europe, që sot po kërkojmë me ngulm të bëhemi pjesë e saj. Europa e sotme është padiskutim thellësisht e ndryshme nga ajo Europë e Luftës së dytë Botërore. Europa e sotme është një bashkësi pa kufij, një bashkësi multietnike, multikulturore, multifetare dhe multigjuhësore. Shqipëria, nëse një ditë do të arrijë të jetë pjesë e familjes Europiane, do ta pasurojë atë me dy vlera themelore: humanizmin, mbrojtjen e tjetrit në rrezik dhe tolerancën fetare.
Te shqiptarët toleranca fetare dhe ajo etnike kanë qenë historikisht të pandara. Në këtë kuptim, ne i kthehemi së shkuarës, historisë së holokaustit, tmerreve të antisemitizmit, jo se ky është një problem i yni për t’u ndarë nga e kaluara, pasi shqiptarët nuk kanë probleme me të kaluarën, por sepse Botës i duhet një thirrje aktuale për frymë bashkëjetese dhe qytetari moderne“.
Me sjelljen ndaj hebrenjve populli shqiptar ka konfirmuar e konfirmon një cilësi të shkëlqyer të botës së saj, një virtyt mbarëpopullor që bën pjesë në imazhin e një vendi të përparuar./Bl.Ba/Fjala.al
