18 viktima dhe 30 të plagosur është bilanci tragjik i një sulmi me bombë që tronditi Kabulin.
Një person i pajisur me eksploziv tentoi të shtunën të vetëflijohet brenda një qendre arsimore.
Mësohet se rojet e sigurisë e pikasën në kohë dhe arritën ta largonin me forcë nga ndërtesa.
Megjithatë, terroristi e çoi deri në fund aktin e tij, duke shpërthyer eksplozivët në një rrugicë të qytetit.
Shteti Islamik ka marrë përsipër përgjegjësinë mbi sulmin.
ISIS ka synuar dhe më herët qendrat arsimore ku pjesa më e madhe e studentëve janë hazara shiit.
Në vitin 2018, dhjetëra persona humbën jetën për shkak të një sulmi të ngjashëm.
Ndonëse bisedimet për paqe kanë nisur në Doha për t’i dhënë fund konfliktit të zgjatur prej dekadash, dhuna midis talebanëve dhe forcave afgane është rritur kohët e fundit.
Bomba në Kabul nuk ishte e vetmja gjatë ditës së shtunë në Afganistan, pasi një bombë buzë rrugës vrau nëntë njerëz në Afganistanin lindor, pranë qytetit Ghazni.
Amnesty International deklaroi të premten se të paktën 50 njerëz gjatë javës së kaluar u vranë nga aktet terroriste./Re.D/Fjala.al
