Shqipëria ka arritur marrëveshjen me Aleancën Gavi për sigurimin e vaksinës Covax Facility që lufton virusin Covid-19.
Ishin Komisionet parlamentare ato që aprovuan marrëveshje mes qeverisë shqiptare dhe Aleancës Gavi. Nga buxheti i shtetit do të para-paguhen rreth 4 milionë dollarë për sigurimin e vaksinës edhe pse ajo akoma nuk është miratuar.
“Lëvizja duhet të jetë e shpejtë sepse në momentin e daljes se vaksinave do jene 2 miliardë. Ndërkohë ne jemi ne një botë me 7 miliardë banorë”, u shpreh zv. Minsitri i Shëndetësisë Albert Nikolla.
Në Shqipëri do të bëhet mbulimi i 20% i popullsisë nga ku do të përfitojnë vaksinim 1.1 milionë persona, përqindje kjo e përcaktuar nga Covax. Të parët përfitues janë personeli shëndetësor, personat me sëmundje bashkëshoqëruese si dhe edukatorët.
“Për të ardhur në këtë ditë janë bërë disa mbledhje teknike. Është mbledhur komiteti i ekspertëve ku është dakordësuar për mbulimin e vaksinës Covax. Ndërkohë, 20% nuk është vendosur nga qeveria shqiptare, por kjo gjë është vendosur nga Covax. Kategoritë i kemi bazuar mbi grupet e riskuara. Punonjës shëndetësor, persona me sëmundje bashkëshoqëruese dhe edukatorët janë pjesë e 20%”, tha Drejtoresha e ISHP, Albana Fico.
Shefja e hetimit Epidemiologjik në QSUT Silva Bino u shpreh se vaksinimi do të kryhet dhe në ato persona që e kanë kaluar Covid-19.
“Fakti që e ke kaluar Covid-19 nuk përdoret si evidencë nëse duhet vaksinohesh apo jo pasi nga studimet ka rezultuar se imuniteti zgjat deri në 5 muaj”, u shpreh Bino.
Në buxhetin e vitit të ardhshëm, qeveria ka parashikuar 12 milionë dollarë për sigurimin e vaksinës. Deri më sot marrëveshjen me COVAX e kanë nënshkruar 90 vende kryesisht anëtare të BE-së.
Pa.Va/Fjala.al
